|
|
Conduchos largos el Rey en biar madaua
Alas aguas de taio olas uistas son apareiadas
Con el Rey atãtas buenas conpanas
Los yffantes de carrio mucho alegres andan
Lo vno a debdan & lo oto pagauan
Como ellos tenien creçer les ya la ganaçia
Qantos qisiessen aueres doro o de plata
El Rey don alfonsso a piessa caualgaua
Cuendes & podestades & muy grandes mesnadas
Los yfantes de carrion lieuan grandes conpanas
Con el Rey van leoneses & mesnadas galizianas
Non son en cuenta sabet las castellanas
Sueltan las Riendas alas vistas seua a delĩnadas
Dentro en vallençia myo çid el campeador
Non lo de tarda pora las vistas se adobo
Tanta gruessa mula & tanto palafre de sazon
Tanta buena arma & tanto bue cauallo coredor
Tanta buena capa & mantos & pelliçones
Chicos & grandes vestidos son de colores
Mynaya albarfanez & aql po vermuez
Marti munoz & marti antolinez el burgales de pro
El obpo don ieronimo coranado meior
Aluar aluarez & aluar sauadorez
Muno gustioz el cauallo de pro
Galind garçiaz el q fue de aragon
Estos se adoban por yr co el campeador
|
