Title	Mocedades de Rodrigo
Date of the manuscript	ca. 1360
Location of the manuscript	Bibliothèque nationale de France, Richelieu: Espagnol 12
Reference in PhiloBiblon	BETA texid 1110
Lenght	1150 versos

Mocedades de Rodrigo. Edición digital
Text view: - Lines: - Switch to view: - A- A+

E Remaneçio la tierra sin senor. qndo moryo el rrey pelayo ¶ Este rrey pelayo avia vna fija de ganancia. ¶ E fue cassada conl conde don suero de casso. ¶ Et fizo en ella el conde don suero vn fijo que dixieron don alfonso. ¶ ¶ E a este don alfon fiziero rrey de leon. ¶ E los castellanos bevian en premja. ¶ E avian guerra con nauarra ¶ & con aragon. ¶ E con los moros de sant esteua de gomaz. & de leon & de sepulveda. ¶ E era olmedo de moros & dende adelante la tierra frontera que avia castilla. bilforado. & grannon. ¶ Et dela otra parte era nauarra frontera de leon. & de carrion & de saldanna. ¶ Et por q los castellanos yvan a cortes al rrey de de leon con fijas & mugieres por esta razon fizieron en castilla dos alcaldes. ¶ E quando fuesse el vno. ala corte. ql otro manparasse la tierra. ¶ Quales fueron estos alcaldes. ¶ El vno fue nunno Rassura. ¶ E el otro layn caluo. Et porq dixieron nuno rrassura este nonbre. por q cogio de castilla senas e mjnas de pan. ¶ E fizo voto a santiago queles ayudasse contra los moros. ¶ E el conde fue aqueste nuno Rassura. de sant pedro de arlança. ¶ E este nuno rasura. ovo vn fijo quel dixieron gonçalo nunnez. ¶ Et porq era malo & traujesso. qissolo el padre matar. & fuesse para el rrey moro guiben. Senor de madrid ¶ E fallo alla a dona aldara sanchez. fija del rey don sancho Ramjrez de navarra. que andaua mala mugier conlos moros. ¶ E pediola por mugier que aca non gela darien. ¶ E casso con ella & traxola a castilla. ¶ E fizo enella tres fijos. & los mayores non valiero nada. ¶ Et el menor fue el conde frrnad gonçalez. que mantouo a ~~grand~~ castilla muy grant tiempo. ¶ Et ovo de aver contienda conel Rey don sancho ordonez de nauarra. ¶ Et este Rey don sancho ordonez fizo vistas conl conde ferrnand gonçalez en vn lugar que diçen vanarez. ¶ E yendo el conde seguro prissol el Rey en engano. Et lleuolo presso a tudela de nava rra. ¶ Et yaziendo el conde presso sacolo dona costança hermana del Rey don sancho ordonez. ¶ Et yaziendo el con de enlos fierros. tomo lo la Jnfanta asus cuestas. Et dio con el en vn monte. ¶ Et encoron a vn açipreste de ay de tudela de navarra. ¶ Et dixo que si la infanta nonle fiziesse amor de su cuerpo quelos descobrerya. ¶ Et la ynfanta fue abraçar lo. Et tenjendole la Jnfanta abraçado. llego el conde con sus fierros. Et matolo conel su cochillo mjsmo del açipste. ¶ Et tenjendo la Jnfanta los ojos. vio venjr grandes poderes. ¶ Et dixo el conde muertos somos mal peccado. Ca hae vos aquj los poderes del rrey don sancho mj hermano. ¶ Et el conde tendio los oJos & fue los poderes devissando. ¶ Et conoçio los poderes. & fue muy ledo & muy pagado & dixo ala infanta esta es castilla q me suele bessar la mano. ¶ Et la jnfanta paro las cuestas. Et caualgo muy puado enla mula del açipste el conde. Et de pie yua la jn fanta. ¶ Et salio del monte puado. & quando lo vieron los castellanos todos se maravillaron. Mas nol bessaron la mano. Nin Senor non llamaron. ¶ Ca avian fecho omenaje. A vna piedra que traxieran enl carro. Que trayan por sennor fasta que fallaron al conde. ¶ Et tornaron la piedra a senblança del monte de oca. al logar donde la sacaron. ¶ E todos al conde por sennor. le bessaron la mano. ¶ Etste conde frrnad gocalz despues que en castilla fue alçaldo ¶ Mato al rey don sacho odonz de nauarra. ¶ Et el fuera en de gollarlo con su mano. ¶ Et non qrya obedeçe el conde. a moro njn xpiano. ¶ Et enbiol dezjr al Rey de leon. fijo de don suero de casso don alfonso avia por nobre ¶ El Rey enbio al conde enpla zar lo. ql venjesse a vistas & fue el conde muy pagado. ¶ Caualgo el conde commo omne tan lozano. ¶ E alos treynta dias conta dos fue el conde al plazo. ¶ Etl plazo fue en saldanna. Et començole el a pguta lo. ¶ Et yo maraujllado me fa go conde como sodes ossado. de non me venjr amjs cortes Nin me bessar la mano. ¶ Ca siempre fue castilla de leon tributario. Ca leon es Regno. Et castilla es condado. ¶ Essas oras dixo el conde. mucho andades en vano. Vos estades sobre buena mu la gruessa & yo sob buen cauallo. ¶ Porque vos yo sofri me fago mucho maraujllado. ¶ En aver sennor castilla & pedir le vos tributaryo. ¶ Essas oras dixo el rrey. enlas cortes sa Juzgado. ¶ Si obedeçe me deuedes. si non fincat vos en saluo. ¶ Essas oras dixo el conde. lleguemos y puado. ¶ En leon son las cortes. llego el conde lozano. ¶ Vn cauallo lieua pçiado. & vn azor enla mano. ¶ Et conpro gelo el rrey. por aver monedado. ¶ En treynta & çinco mjll mr. fue el cauallo & el azor apçiado. ¶ Al gallarin gelo vendio el conde que gelo pa. conde que gelo pagasse a dia de plazo. ¶ largos plazos passaron que non fue el conde pagado. ¶ Nyn qrie yr alas cortes a menos de entregar lo. ¶ Con fijos & con fijos & con mugieres castellanos va alas cortes de leon. ¶ E conde ferrnan gonzalez. dixo al rrey atanto. Rey non verne a vras cortes. a menos [tachado: amenos] de ser pagado. del auer que me deuedes. de mj azor & de mj cauallo. ¶ Qndo contaron el auer el Rey non podia pagar lo. Tanto creçio el gallaryn qlo non pagaria el regnado ¶ Venjeron abenençia el rrey & el conde lozano. ¶ Que qtasse a castilla. el conde fue mucho pagado. ¶ plogol al conde quando oyo este mandado ¶ Assy saco a castilla el buen conde don fenado. ¶ Aujendo guerra con moros & con xianos a toda parte de todo su condado. ¶ Avia el conde vn fijo que garçi frrz fue llamado. ¶ Sy el padre fue buen guerrero el fijo fue atamano. ¶ Con fija de almeq de nabona el code gaçi frrz fue cassado. ¶ Con ella. Et fizo vn fijo. que dixieron el conde don sancho ¶ Quando alos .vij anos los Jnfantes de salas mataron. ¶ Morio el conde gaci frrz cotes. infançon castellano. ¶ El buen code don sancho. & dexoles buenos preujllejos. ¶ Et buenos fueros co su mano. Et fue rreçebir fija del rrey de leo. nuera del conde don suero de casso. ¶ Et enella fizo vn fijo quel. dixieron por nobre sancho. ¶ Atanto salio de cazador quel monte quel non cogia el poblado. ¶ Pussol por nonbre el padre sancho avorta. por amo de destyr ¶ Desque vio el padre que era de edat a burgos fue llegado. alos treynta dias conplidos. ayuntan se y los castellano. ¶ desq los vio el conde en pie fue leuantado. ¶ Oyt me castellanos a buen tiempo so llegado. ¶ Por vos fazer mas mçed que nunca vos fizo omne nado. ¶ El conde ferrnad gz mj avuelo. Saco vos de tributario. ¶ El conde gaçi frrz mj padre. E yo diuos fueros & pujllejos confirmados con mj mano. ¶ de condado que es castilla. fago vos la rreynado. ¶ ffagamos mjo fijo sancho avarca rrey si vedes que es gssado. ¶ Nieto es del Rey de leo. non ha quel diga ome nado. ¶ Que non sea rrey de castilla njnguno non sera ossado. ¶ synon aql quien lo dixiesse. bien sabria vedar lo. ¶ Mucho plogo a castellanos qndo oyeron este madado. ¶ A sancho avarca bessan las ma nos. Et rreal rreal llamando. ¶ Por castilla dan los pregones por tan buen rrey que alçaron. ¶ Este fue el pmo Rey que castellanos ovieron. ¶ Con grand onrra & grand prez. grandes alegas fezjero. ¶ Etl buen rrey sancho avaca. comezo. de rreyna & mado faze senas tendidas en cada logar ¶ Con fija del Rey de françia se ovo a despossar ¶ Et dio gela de grado. non le fezjero al. Et la ynfata dize dona ysabel. E esta fue Reyna de prestar El rrey don sancho. avarca fue por ella. Ca tiempo avia de cassar con ella. ¶ A los puertos de aspa gela traxieron Etl Rey de francia. Et el ally fue a tomar la. ¶ grandes alegas ha en espanna quando el rrey cola rreyna viero tornar ¶ Et mayor los castellanos. quando la mano le fueron bessar ¶ Et el conde don pedro de palençia. a burgos le fue cobidar ¶ Rey don sancho auaca. por amor de caridat. fijo del conde don sancho mj Senor natural. ¶ vayamos a paleçia. mjo conbite tomar. ¶ Ca siempre vos sujre mjent mj vida durar. ¶ dixo estonçe el rrey bueno. fazer lo he de grado. ¶ En tal que enla mj vida nunca seades menguado. ¶ Esto fue nueue dias ante de sant iohan. ¶ Qndo el Rey don sancho llego a palençia yantar ¶ Brauo era el val de palençia ca non avia y poblado. ¶ Synon do llaman santa ma. el antigua do moraua el conde lozano. ¶ Salieron se a folgar desque ovieron yantado. ¶ E passaron las aguas amos de mano a mano. ¶ affondose la mula. conel Rey en vn soterraano: a. ¶ Acorrense las gentes. & sacaron al Rey en saluo. ¶ Por los braços qbro la mula. non la caualgo mas omne nado. ¶ El rrey tendio los ojos. & vio por el soterranno. descende. vna escalera de vn canto labrado. ¶ demando por vn caualo que dezian bernardo. ¶ diz entra benado por essa escalera. & cata este soterranno ¶ dixo benaldo senor plaze me de granado. ¶ benardo quando desçedio vio vn pozo cavado. ¶ E a par de aquel pozo. vio estar vn altar ¶ Et de susso vn escpto. Et començolo de catar. ffallo que sant antolin matir yazja en aquel logar ¶ Et vio vna piedra con letras Et començola de catar & vio que trezientos anos avia que era somjdo aquel logar. ¶ E vino se para el Rey & dixol en porydat. ¶ Senor commo me semeja. cuerpo santo yaze en este logar. ¶ Quando el rrey. al conde fue tornado. ¶ Quando lo oyo el Rey. al conde fue tornado. ¶ Et dixo ay conde don pedro. dat me este logar en camjo. ¶ E siemp uos lo gdeçere. en quanto fuere durado ¶ Et dar vos he por el a canpo. fasta en la mar. ¶ Ally dixo el conde don pedro. al rrey plaze me de grado. ¶ Dan selas verdades. Et otorgaron se el cambio. ¶ Estonçe traya el conde a çico vandas las armas. ¶ Et las dos eran yndias Et las tres de oro colado ¶ Ally tomo otras el conde el campo de oro claro. vna agla yndia. en medio gritado. campo yua llamado ¶ Por esso llaman agujllar: l]ar de canpo. desq el erzio condado ¶ El Rey en plazentya. finco alegre & pagado. ¶ llegaronle mandados de su avuelo el rrey de leon que era finado. ¶ fincaron le tres fijas. Et non fijo varon. ¶ Ca el Rey conla vna fue cassado ¶ E el conde don ossorio galeçia. Conla otra. el que don ordono. de campos mucho onrrado ¶ Et la otra conel conde nuno aluarez de amaya que ovo a amaya por condado. ¶ Et fincaron enel Rey don sancho avarca todos los rreynos en su mano. ¶ Et dixo asu cauallo benado. ¶ Que catasse el soterr[a]nno. ¶ Et oyredes lo q aconteçio. estonçe en aquel anno. ¶ Estando el arçobpo. Enel pueblo toledano. en dia de rramos en visag la missa catado. ¶ Ala ora dela passyon entraron moros el poblado. & ganaron a toledo. a menos del poblado. & guareçio el arçobispo a poder de cauallo. ¶ A porto e palencia a donde esta bernardo. ssiendo bernado su sobrino fijo de su hermano. ¶ Qndo vio al arçobispo. dexo el soterranno ¶ Et fuesse para deffessa braua meter se hemjtano. ¶ En vna hemjta que avia y. otro poblado. ¶ Miro & quando vio este lugar caualgo muy puado. ¶ ffuese para leon al bue Rey don sancho. ¶ delos ojos llorando. Et bessole la mano. Senor Rey don sancho. avarca por el padre. apoderado. ¶ Perdi a toledo moros me lo han ganado. ¶ Senor dat me a palençia. & a aquel soterrano. ¶ Et fare vida de que dios sea pagado. ¶ de arçobpo que era biujre commo hermjtano. ¶ Etn essas horas. dixo el Rey. plaze me muy de grado. ¶ A pessa dixo mjo sennor. yt me a entregarlo. ¶ Et entrante a palençia tomolo por la mano. ¶ Como lo yo conpre del code. don pedro franco. do lo de grado. ¶ E fagan vn puillegio co. mjo sigo otrgado. ¶ dela hueta del campo. do es oter rredondo llamado. ¶ Conlas cuestas del atalaya & delos cascaJares del brauo. ¶ E dela otra parte las cuestas como van a val rroçiado. ¶ Muy bien lo rreçibe mjro el perlado & tomo el previlejo del Rey. ¶ Et caualgo muy puado. & metiosse alos camjnos para Roma fue llegado. ¶ Et qndo vio al papa el pie le ovo bessado meçed dixo senor que sodes en lugar de sant pedro & sant pablo. Siendo yo arçobpo del pueblo toledano. ¶ Conqrieron me los moros onde fue muy coytado. vine me pa el Rey don sancho avarca. fijo del conde don sancho commo a ome de buena ven tura que en buen puto fue nado. enl val de palencia. abriose vn soterrano. ¶ E affondo se la mula. Et el finco en sano ¶ A sant antolin matir fallaron y soterrado ¶ A priessa lo conpro luego el. Rey de vn conde lozano. ¶ Qndo yo pdi a toledo amj lo ovo dado el Rey. ¶ Aheuos aq su pujllejo. commo lo trayo otorgado. ¶ El papa quando quando vio el pujllejo con signo acabado. dixo fizo commo Rey de buena venta. en faze tan bue loga franqueado. ¶ fagamos y vna dignjdat de que dios sea pagado. ¶ Pues lo diero ala yglia. de mj sea otorgado ¶ Ati mjro episcopus paletio mucho onrrado. ¶ Qndo estos pujllejos el obis po del papa ovo tomado ¶ A jornadas contadas. a espanna fue tonado. ¶ Sopo lo el rrey don sancho avaca & reçebiolo muy de grado ¶ Entrante ote rredondo. tomo lo el rrey por la mano. ffasta sant antolin non qisso dexallo. E dixo yo vos la franqo. ansi commo vos lo yo ove dado ¶ Fijo que yo aya que fuere en deman dar lo. la mj maldezio aya Et non le ayude omne nado. ¶ Et el qlo ayudare sea tydor provado. & de parte dela yglia Maldito sea & descomulgado. Et do el poder ala yglia. con mj sello colgado. ¶ Por quel Rey era Rey de leon. desmanparo a castellanos. ¶ E vedes por ql rrazon. porq era leon cabeza delos rreynado. ¶ Alçosele castilla. & duro. bien diez & siete anos. ¶ Alçaron sele los otros linaJes donde venjan los fijos dalgo. donde son estos linajes. del otro alcalde layn caluo. donde fue este layn caluo. natural de monte de oca. ¶ Et vino a sant pedro de carde na a poblar este lay caluo Con qt fijos q llegaro a bue stado. ¶ Con seysçientos cavallos a castilla manpararon. ¶ Aviendo guerra con navarra. Ruy laynez el mayor poblo a faro. galduy laynez de se ovo a men doça & tmjno poblado. ¶ Aviendo guerra con moros donde rreçebiero grand danno ¶ Siendo sant esteuan de gormaz de moros. & leon del otro cabo ATienza & çigueça con que biujen castellanos en trabaJo Sepulueda & olmedo de vn moro pagano. ¶ A pessar de aquestos todos vn fijo de layn caluo. ¶ Aquel dizen penna flor. con qual es penna fiel llamado. ¶ Aviendo guerra conel Rey de leon & con leonesses el menor de layn [interlineado: caluo] ¶ Quel dixiero diego. laynz. este ovo a saldanna por frota ¶ grand tiempo passado. ovo a morir el rrey sancho avarca. ¶ Estando la tierra en este tbajo. tres fijos dexo el Rey el dia que fue finado. ¶ Con alfonso el mayor leonesses se alzaron. ¶ E don garçia el mediano. a navarra fue alçado. ¶ Por senor le tomaron. a don fernando el menor la mano le bessaron castellano commo fijos de layn caluo. ¶ Dio guerra asus hermanos. vençidos fueron leonesses. ¶ Et rreçebieron gnd danno alos fitos de mansilla. ¶ Do estauan los moJones fincados Mato don fernando a don alfoso su hermano. luego sele dieron le ones & galizja fasta santiago. ¶ Torno dar guerra a navarra commo de cabo. ¶ Et mato en ata pueta a don garçia su hermano. Diosele luego navarra. Et aragon del otro cabo. ¶ desde ally se llamo sennor de espanna fasta en santiago. ¶ Pregunto por navarra. sy avia quien heredar lo. ¶ ffablo la ynfanta dona sacha fija del Rey don sancho. ¶ E el gouenador de navarra. ¶ Et fablo el ynfante don Ramjro Mas non era de velada. ¶ Mas por quanto era fijo deste Rey don sancho. Et que non se ena genasse el rreyno diogelo don ferrnando. Assy assosego su tierra. a çamora fue llegado. Mandando por sus Reynos que venjessen asus cotes. ¶ Alos treynta dias contados ally vinjen leonesses. Et con gallizianos & con astyano. Et venjero aragonesses abueltas con navarros. los postrimeros fuero castellanos & estremadannos. ¶ Delos fijos de layn caluo todos qtro hermanos. Don Ruy laynez fue cassado co fija de don gonzalo mjnayas ¶ Et fizo en ella a don diego ordones donde vienen estos Que de vizcaya son llamado Galdin laynez fue cassado con fija del conde don rro. ¶ Conel conde de alua & de bitoria Et fizo enella vn fijo ql dezjan don lope. Donde vienen estos laynez de don luys diaz de medoça El ynfante laynez [tachado: l] era cassado con fija del code don aluaro de feuza. ¶ Et fizo enella vn fijo q dixieron aluar fannez. donde viene estos linaJes de castro. Diego laynez se ovo cassado con dona theressa nunnez fija del conde Ramo aluarez de amaya. & njeta del rrey de leo ¶ Et fizo enella vn fijo quel dixieron el buen guerreador Ruy diaz ¶ Ally sse leuanto el rey. alos qtro fijos de layn caluo Tomolos por las manos consigo los pusso enel estrado ¶ Oyt me cavalleros muy buenos fijos fijos dalgo. del mas onrrado alcalde que en castilla fue nado. ¶ Distes me a castilla & bessastes me la mano. Con vusco coqri los Reynos de espanna fasta santiago. ¶ Vos sodes ançianos & yo del mundo non se tanto. Mi cuerpo & mj poder metolo en vras manos. ¶ Que vos me consejedes ssyn arte & sin engano Rey soy de castilla & de leo assy ffago. ¶ Sabedes q leo es cabeza de todos los rreynados. ¶ Et por esso vos Ruego. & a vos pregunto tanto. Qual sena me mandades faze atal fare de grado. Ca en quanto yo valga. non vos saldre de mandado. . dixieron los castellanos. en buen punto fuestes nado ¶ Mandat fazer vn castillo de oro & vn leon yndio gtado ¶ Mucho plogo al rey qndo los Reynos se pagaron. Bien ordeno el rrey su trra. commo Rey mucho acabado ¶ Otogo todos los fueros. que el rey su padre avia dado Otogo los pujlleJos de su avuelo el conde do sancho ¶ Alli llego de palençia el mandado que era muerto el obpo [interlineado: mjro] ¶ Et dio el obpado a benado Et enbiol quel confirmase a Roma & vino muy buen perlado ¶ Et otogo sus libetades que el rrey sancho avarca avia dado. ¶ desde la hueta del topo fasta do es la quintanjlla con todo fasta castiel Redondo. do es magaz llamado. detras delas cuestas delas. cuestas delos cascajares. do es santo thome llamado. fasta las otras cuestas. que llaman val rroyado. do llaman val de pero. Ca non era poblado. ¶ Mando enlos preujllejos pon signo el bue Rey don ferrnando. Asosegada estaua la tierra. q non avie guerra de njgu cabo. ¶ El conde don gomez de goma. a diego laynez fizo danno. fferiole los pastores. Et Robole el ganado. ¶ A bivar llego diego laynez. al apellydo fue llegado. ¶ El enbio los rreçebir asus he manos. & caualga muy puado. ¶ ffuero correr a gormaz. qndo el sol era Rayado. Quemaron le el arraual & comenzaron le el andamjo. Et te los vassallos. Et quanto tiene enlas manos ¶ Et trae los ganados qntos andan[tachado: t]. por el campo. ¶ Et trae le por dessonrra las la uanderas que al ag esta lauando. ¶ Tras ellos salio el conde co çient cauallos fijos dalgo. ¶ Rebtando a grandes bozes. a fijo de layn caluo. dexat mjs lauanderas. fijo del alcalde çibdadano. ¶ Ca mj non me atenderedes atantos por tantos por quanto el esta escaletado. Redro Ruy laynes. sennor que era de faro. ¶ Cyento por ciento vos se mos de buena mjente & al pulgar ¶ Otorganse los omenaJes que fuessen y al dia de plazo. ¶ Tornan le delas lauanderas & delos vassallos. Mas non le dieron el ganado. Ca selo qrien tener. Por lo que el conde avia leuado. ¶ Alos nueue dias contados} Caualgam muy puado. Rodrigo fijo de don diego Et njeto de layn caluo. Et njeto del conde nuno aluarz de amaya. Et visnjeto del rey de leo doze anos avia por cuenta & avn los tze non son Nunca se viera en lit ya qbrauale el corazon. ¶ Cuentasse enlos çien lidiadors que qisso el padre o que non. Enlos pmeros golpes suyo & del conde don gomez son. Paradas estan las hazes E comjenzan a lidiar. Rodrigo mato al conde Ca non lo pudo tadar. Venjdos son los çiento. & pienssan de lydiar. En pos ellos salio rodrigo que los non da vaga. ¶ Prisso a dos fijos del conde a todo su mal pessar. ¶ A ferna gomz & alfoso gomz Et traxo los a biuar ¶ Tres fijas avia el conde cada vna por cassar. ¶ E la vna era elujra gomz Et la mediana aldonza gomez ¶ Et ala ot ximena gomz la menor Qndo sopieron q eran pressos los hermanos. Et q era muerto el padre. panos viste brunj tados. Et velos a toda parte. ¶ Estonce la avian por duelo agora por gozo. la traen. ¶ Salen de gomaz. & vanse para biuar Vio las venj don diego. Et a Reçebirlas sale. Donde son aqstas freyras. que algo me viene demandar. Dezir vos hemos senor. que non avemos por que vos lo nega. ffijas somos del conde don. gormaz. & vos le madastes. matar Prissistes nos los hermanos. Et tenedes los aca. ¶ Et nos mugieres somos que non ay quien nos anpare. Essas oras dixo do diego. non deuedes amj culpar. Pedit las a Rodrigo. sy vos las qsiere dar. prometolo yo a xpistus. amj non me puede pessar. Aqsto oyo Rodrigo comenzo. de fablar. Mal fezistes senor. deuos negar la vdat. Que yo sere vro fijo. Et se de mj madre. Parat mjentes al mundo. Sennor por carydat. Non han culpa las fijas. por lo q fizo el padre. Dat les a sus hermanos. que muy meneste los han. Contra estas duenas. mesura deuedes catar. ¶ Ally dixo don don diego. fijo mandat gelos dar. Sueltan los hermanos. alas duenas los dan. Qndo ellos se viero fuera. en saluo comenzaron de fabla. ¶ Quinze dias possieron de plazo. a Rodrigo & asu padre. Quelos vengamos qmar. de noche enlas cassas de biuar. ¶ ffablo ximena gomez la menor. Mesura dixo hermanos. por amor de caridat. yr me para camora. al Rey don fenando querellar. Et mas fincaredes en saluo. Et el derecho vos dara. Alli caualgo ximena gomz. tres doncellas con ella van. ¶ Et otros escuderos quela avian de guad. llegaua a zamora. do la corte del Rey esta. llorando delos [interlineado mano 2: ojos] [mano 1] & pediendol piedat. Rey duena so lazrada. Et ave me piedat. Orphanjlla finque peqna. dela condessa mj madre. ffijo de don diego laynez. ffizo me mucho mal. Prisso me mjs hermanos. & matome a mi padre. A vos que sodes Rey. vengo me a qrellar ¶ Sennor por merçed derecho me mandat dar Mucho pesso. al rey. Et començo de fablar En grant coyta son mjs Reynos castilla alçar se me ha. ¶ Et sy se me alçan castellanos ffazer me han mucho mal. Quando lo oyo ximena gomz las manos le fue bessar ¶ Merçed dixo senor. non lo tengades a mal. Mostrar vos he assosegar a castilla. & alos reyno ot tal Dat me a Rodrigo por marido aql q mato amj padre. ¶ Qndo aqsto oyo el code do ossorio. amo del rrey don fernando. ¶ Tomo el Rey porlas manos. & aparte yva sacallo. Senor que vos semeJa que don vos ha demandado. ¶ Mucho lo deuedes agdeçe. al padre apoderado. Senor enbiat por Rodrigo. & por su padre puado. A pessa fazen las cartas que non lo qieren tardar Danlas al mensajero al camjno es entrado. ¶ Quando llego a biuar don diego estaua folgado ¶ dixo omjllo me. avos senor ca vos trayo buen madado ¶ Etnbia por vos & por vro fijo. el bue rrey do fenando. vedes aquj sus cartas firmadas q vos trayo ¶ Que sy dios qsiere sa ayna Rodrigo encimado Don diego cato las cartas Et ovo la color mudado. Sospecho que porla muete del [interlineado: conde] queria el rey matar lo. ¶ ¶ Oyt me dixo mj fijo mjentes catedes acae. Temome de aqstas cartas que andan con falsedat. ¶ Et desto los rreys muy malas costumbres han ¶ Al rey que vos sujdes. sujllo muy sin arte. ¶ Assy vos aguadat del commo de enemigo motal ffijo passat vos para faro. do vro tyo Ruy laynez esta. ¶ Et yo yre ala cote. do el buen Rey esta. ¶ Et sy a por aventura el rey me [interlineado: matar] Vos & vros tios pode me hedes ¶ vengar. Ally dixo Rodrigo. Et esso non seria la verdat. ¶ por lo q vos passaredes. por esso qiero yo passar ¶ Maguer sodes mj padre qujero vos yo aconsejar. Treçientos caualleros todos convusco los leuat Ala entrada de çamora Senor amj los dat ¶ Essa ora dixo don diego pues pensemos de andar ¶ Metense alos camjnos para çamora van. Alla entrada de çamora alla do duero cay Armanse los trezjentos & rodrigo otro tale ¶ desquelos vio Rodrigo armados. començo de fablar ¶ Oyt me dixo amjgos pari entes & vasallos demj padre ¶ Aguardat vro senor sin engano & sin arte. Sy vieredes que el alguazil lo qsiere prender mucho a pessa lo matat. Tan negro dia aya el rey commo los otros que ay estan. Non vos pueden dezjr tydors por vos al rey mata Que non somos sus vasallos njn dios non lo mande. Que mas trayador sya el rey Sy amj padre matasse Por yo mata mj. enemigo en buena lid en campo. yrado contrala corte et do. esta el buen Rey don fernado. ¶ Todos dizen ael que el que mato. al conde lozano. ¶ Quando Rodrigo bolujo los oJos todos yvan derramado. ¶ Avien muy grant pauor. del & muy grande espanto. ¶ Allego don diego laynez. al rey bessar le la mano. ¶ Quando esto vio Rodrigo. non le qisso bessar la mano. Rodrigo finco los ynoJos. por le bessar la mano. ¶ El espada tya luenga. el Rey fue mal espantado. A grandes bozes dixo. Tirat me alla esse peccado. Dixo estonçe don Rodrigo qrria mas vn clauo Que vos seades mj senor. nj yo vro vassallo. ¶ Por q uos la besso mj padre Soy yo mal amanzellado. ¶ Essas oras dixo el rey al. conde don ossorio su amo. Dad me vos aca essa doçella. despossaremos este lozano. ¶ Avn non lo creyo don diego. tanto estaua espantado. Salio la donçella. Et te la el conde por la mano. ¶ Ella tendio los ojos. Et a Rodrigo comezo de catalo. ¶ Dixo senor muchas meçedes. Ca este es el conde q yo demado. ¶ Ally despossauan a dona ximena gomz co rro el castellano. ¶ Rodrigo respodio muy sanudo. cont el Rey castellano. Senor vos me despossastes. mas a mj pessar que de grado. ¶ Mas pmetolo a xpus. q vos non besse la mano. Nyn me vea con ella. en yemo nj en poblado. ¶ ffasta q venza çinco lides. en buena lid en canpo. ¶ Qndo esto oyo el Rey. fizo se maravillado. dixo. ¶ Non es este ome. mas figura ha de peccado. ¶ Dixo el conde don ossorio. mostrar vos lo he puado. ¶ Quando los moros corriere. a castilla non le acorra ome nado. ¶ veremos silo dize de veras. o silo dize baffando. ¶ Alli espedieron padre & fijo. Al camjno fueron entdos. ¶ ffuesse para biuar a sant ped. de cardenna por morar y el vano. ¶ Corryo el moro a burgos. de ayllon muy lozano. ¶ Et el arrayaz bulcor. de sepulueda muy honrrado. ¶ E su hermano tosios el arrayaz. de olmedo muy Rico. & mucho abondado. ¶ Entre todos era .v. mjll moros. a cauallo. ¶ Et fueron corre a castilla. Et llegaro a bilforado. ¶ Et qmaro a Redezilla. Et a gnon de cabo a cabo. ¶ A Rodrigo llego el apellido. qndo en siesta estaua adomjdo. ¶ Deffendio q njng non desperta sse asu padre sol non fuesse vssado. ¶ Meten se alas amas & cavalgan muy priuado. ¶ Trezientos cavallos del pad. vanlo aguardando. ¶ Et otras gentes de castilla. q sele yuan llegando. ¶ Et los moros venjen Robado. la tierra & fazjendo mucho danno. ¶ Trayan grant poder con Robo de ganado. Et xianos captiuos mal peccado. Ala naua del grillo. do es lerma llamado. ally los alcanço Rodrigo. SEgujo los en alcaçe lidio con los algareros que non conlos que leuauan el ganado. ¶ Et alos vnos mato. Et alos otros fue arramando. ¶ Por el campo de gomjel. a yoda llegaron. ¶ Do yuan los poderes. conel Robo tamanno. ¶ Ally lidio Rodrigo conellos buena lid enel campo ¶ vn dia & vna noche fasta otro dia mediado ¶ Etstudo en pesso la batalla & el torneo mesclado. ¶ Rodrigo vençio la batalla dios sea loado. ¶ ffasta penna falcon. Do es penna f[tachado: i]fiel lamado las aguas de duero. yvan las enturbiando ¶ Ally bolujeron vn torneo Cont fuente duenna llegando ¶ Mato Rodrigo alos dos arra yazes. & psso al moro burgos loçano ¶ El txo los paganos cotra tudela de duero & el ganado. ¶ Captiuos & captiuas. Traxo los el castellano. ¶ En çamora llegaro los manda dos do era el buen rey do ferr ¶ El rey qndo lo sopo fue ledo & pagado ¶ Ay dios que grande alegria fazia el rey castellano ¶ Caualgo el buen Rey. conel muchos condes. & cauallos Et otros omnes fijos dalgo. ¶ ffuese para tudela de duero do paçia el ganado. ¶ Rodrigo qndol vio venjr Reçebiolo muy puado ¶ Cata dixo buen Rey que te tyo Maguera non so tu vassallo ¶ de çinco lides que te pmeti el dia q tu me oviste desposado. ¶ vençido he la vna yo catare por las qtro. ¶ Essas oras dixo el bue Rey por todo seas pedonado ¶ En tal que me des el quinto. De qnto aq has ganado. ¶ Estonçe dixo Rodrigo. sola mete non sea pesado. ¶ Que yo lo dare alos mesquinos. que assaz lo han lazrado. Lo suyo dare alos diezmos q non qero su peccado ¶ Delo mjo dare soldadas aquellos q me aguardaron. Essas oras dixo el bue rey dame aesse moro lozano. ¶ Estonçe dixo Rodrigo. sola mete non sea pensado. ¶ Que non por quanto yo valgo. que fidalgo a fidalgo quandol prende. non deue dessonrrar lo ¶ Demas non vos dare el quinto. Synon de aver monedado. ¶ Que dar lo he amjs vassallos que assaz melo han lazerado ¶ Despedieron se del rey. Et bessaron le la mano. ¶ Trezientos caualleros fuero por cuenta los que ally fueron juntados. Quando esto vio Rodrigo. alos moros se tono priuado. ¶ Oyt melo Rey moro burgos de ayllon muy lozano yo non pnderia rey Nin amj non seria dado. ¶ Mas Rogue vos que venjesedes con mjgo. vos fezistes lo de grado. yt vos para vuestro reynado Saluo & seguro que en toda la mj vida non ayades mjedo. de rey moro njn de xpiano. ¶ Quanto avian los arrayazes que yo mate vos heredat lo Sy vos qsiere abrir las [tachado: ul] villas sinon enbiat me mandado. yo fare que vos abran a mjedo que non de grado. ¶ Qndo esto vio el moro burgos de ayllon muy lozano ¶ ffinco los ynoJos delante rr & besso le la mano de boca fablando. ATy digo el mj sennor yo so el tu vassallo. Et do te de mj ave el quinto & tus parias en cada anno Alegre se va el moro. alegre se torno el castellano ¶ Parias le enbio el Rey moro. de ayllon muy lozano. Que para en qtro anos. Fuesse Rico & abondado. ¶ Sopolo el conde don m gz De nauarra. caualgo muy puado. Et fuesse para el Rey Senor pesse te del tu danno ¶ Calahora & tudela forçada tela ha el buen Rey don ferrnando Sennor da me tus cartas. & yre desafiarlo. yo sere tu justador Conbater lo he puado. ¶ Essas horas dixo el rey ssea te otorgado. las cartas dan al conde Al camjno es entrado. Allegaua a çamora. al buen Rey don fernando. ¶ Entro por la corte. al buen Rey besso la mano. ¶ E dixo oyt me Rey de grand poder. vn poco sea escuchado. Mensagero con cartas non deue tomar mal njn Reçebir danno. ¶ Enbia vos desafiar el rey de aragon. avos & atodo vuestro Reynado. ¶ Vedes aquj sus cartas. yo vos trayo el mandado. ¶ Synon dat me vn justador De todo vuestro reynado. yo lidiare por el Rey de aragon Que so su uassallo. ¶ Quando esto oyo el rey En pie fue leuantado ¶ E dixo pessar devia a dios Et a todo su Reynado. De tal cossa començar rey Que deuja ser su vassallo ¶ Qujen gelo consejo. E como fue dello ossado. Qual seria de mjs Reynos amjgo o pariente o vassallo. Que por mj qssiese lidiar ESTE Rieto. Rodrigo alos tres Rodrigo alos tres dias. a çamora ha llegado. ¶ vio estar al rey muy tste ante el fue parado. Sonrrisando se yva & dela boca fablando. Rey que manda a castilla & a leo non deue ser desconortado ¶ Rey qien vos fizo pessar o como fue dello ossado ¶ De presso o de muerto non vos saldra dela mano ¶ Essas horas dixo el rey Seas bien aventurado ¶ A dios mucho agradesco por v q eres aqui llegado Ati digo la mj coyta[tachado: d] donde soy coytado. ¶ Enbio me desafiar el rey de aragon. & nunca gelo ove buscado. ¶ Enbiome dezjr ql diesse a calahorra. amjdos o de grado o quel diesse vn justador de todo el mj Regnado ¶ Querelleme en mj cote a todos los fijos dalgo. Non me respondio ome nada ¶ Respondele tu Rodrigo mj pariente & mj vasallo fijo eres de diego laynez & njeto de layn caluo. ¶ Essas horas dixo Rodrigo Senor plaçe me de grado ¶ Atal plazo nos dedes que pueda s tornado. ¶ Que quiero yr en Romya al padron de santiago Et a santa maria de Rocamador Sy dios qsiere guissarlo ¶ Essas horas dixo el rey en treynta dias avras afarto El conde con grand bi en pie fue leuantado ¶ Et dixo [tachado: al] rey en treynta dias mucho es grand plazo Que mas me qria ver con rr. que quien me diesse vn condado. ¶ Estonçe dixo Rodrigo. Conde por que vos qxades tanto. ¶ Que a quien diablos han de tomar chica es posiesta de mayo ¶ Essas horas dixo el rey. ve tu via bien aventurado ¶ Alos camjnos ent rodrigo pessol & a mal grado De qual dizen benabete. Segunt dize enel Romaçe ¶ E passo por astorga. Et llego a monte yralgo Complio su Romya por sant saluador de oviedo. ¶ fue tornado ala condessa dona theresa nunnez. & a priessa ovo pre guntado. ¶ Senora quantos dias ha passados que yo fue en Romya a santiago ¶ Et dixo la condessa oy passan veynte & seys dias Cras san los veynte & syete dias llegados. Quado esto oyo Rodrigo fue mal amanzellado. & dixo Caualgat mjs caualleros & non qrades tardarlo. Vayamos nos suj al buen Rey don fernando. que tres dias. ha non mas para complir se el plazo Alos camjnos ent Rodrigo con treçientos fijos dalgo Al vado de cascajar. a do duero fue apartado fuerte dia fazia de frio ala posiesta en llegando ala horilla del vado estaua vn peccador de malato A todos pediendo piedat qle passasen el vado. Los caualleros todos escopian Et yvanse del arredrando. ¶ Rodrigo ovo del duelo Et tomolo por la mano so vna capa vde aguadera passolo por el vado En vn mullo andador q su padre le avia dado E fuesse para greJalua do es cerrato llamado So vnas piedras cauadas que era el poblado. Sola capa verde aguadera aluergo el castellano & el malato ¶ E en siendo dormjendo ala oreJa le fablo el gapho ¶ Dormjdes Rodrigo de biuar Tiempo has de ser acordado. mensagero so de xpistus. que non soy malato. ¶ Sant lazaro so ati me ovo dios enbiado. que te de vn Resollo enlas espaldas que en calentura seas tornado [interlineado mano 2: ntrado] Que quando esta calentura ovieres que te sea menbrado. Quantas cossas comenzares arrematar las con tu mano Diol vn rresollo enlas espaldas que alos pechos le ha passado ¶ Rodrigo despeto & fue muy mal espantado. Cato en derredor de ssy Et non pudo fallar el gapho Menbrole daquel suenno [tachado: e] Et caualgo muy priuado ffuesse para cahorra de dia Et de noche andando y era el Rey don rramjro de arago. y era el rey don ferr y era el rey don ordonno de na varra venjdo era el dia del plaço Et non assomaua el castellano} En priessa se vio el & a diego laynez ovo buscado. Diego laynez vos lidiat este rrieto por saluar a vuestro fijo que avos era dado. Dixo diego laynez Sennor plaze me de grado Arman le mucho a priessa el cuerpo & el cauallo. Quando quisso caualgar assomo el castellano ¶ A Reçebir le sale el rey con muchos fijos dalgo Adelante dixo a Rodrigo por que tadades tanto Estonçe dixo Rodrigo Sennor non sea culpado Ca avn fasta el sol puesto es todo el dia mj plazo lidiare en esse cauallo de mj pad que el mjo viene muy cansado Dixo diego laynez. fijo plaze me de grado ¶ El Rey con grant plazer parosse armarlo. Dixo Rodrigo Sennor non sea culpado. Caualgar qria Rodrigo. non qria tardar lo. Non le venja la calentura que le auja dicho el malato Dixo al rey Sennor dad me vna sopa en vino Quando quisso tomar la sopa la calentura ovo llegado en logar de tomar la sopa tomo la rrienda del cauallo enderezo el pendo Et el escudo ovo enb[tachado: a]razado E ffuese para ally do estaua el nauarro. ¶ El navarro llamo aragon. Et castilla el castellano yuan se dar senos golpes los cauallos encostaron Dixo el conde nauarro que cauallo tes castellano Dixo Rodrigo de biuar. quieres trocarlo Cambia lo comjgo Sy el tuyo es mas flaco Ally dixo el conde non me sya dado. partieron les el sol Et los fieles commo de cabo yvan se dar sennos golpes & errol el conde navarro Non lo erro Rodrigo de biuar vn golpe le fue dar quele abatio del cauallo. en ante que el conde se leuantase. deçedio a degollar lo. desta gujssa gano a calahorra Rodrigo el castellano Por el buen Rey don fenado El dia de santa cruz de mayo que atiença avia por Reynado el Rey moro jesyas de guadala jara. Que a africa ovo pobla do aquel moro jessyas mucho honrrado madriano. ¶ E sopo lo el rey moro burgos De ayllon muy lozano. Et vino se para castilla de dia Et de noche andando. A biuar enbio el mandado Et quando lo sopo Rodrigo Caualgo muy priuado. entre dia & noche a çamora es [^llegado] al rey se omjillo. & nol besso la mano Dixo Rey mucho me plaze por que non so tu vassallo Rey fasta que non te armasses non deujas tener Reynado Ca non esperas palmada de moro njn de xpiano. Mas ve velar al padron de santiago quando oyeres la missa Armate con tu mano Et tu te cine la espada con tu mano. & tu decinne commo de cabo E tu te sey el padrino. Et tu sey el afijado Et llamate cauallo del padro de [^santiago] E seryas tu mj sennor Et mandarias el tu Reynado Essas horas dixo el rey en tanto fue acordado. Non ha cossa Rodrigo que non faga por te non salir de mandado Metieronse alos camjnos passol Rodrigo a mal grado que dizen [tachado: i] benauente segu dize enel Romançe. passo lo a astoga Et metiolo a monte yraglo. De ally se tono Rodrigo que le apresuraua el mandado que se agujssauan paganos para correr el reynado De noche llego Rodrigo a biuar daua su apellido que non lo entendiessen los que vendian el reynado A sant esteuan fue diego laynz llegado. & don rruy laynez de alfaro E don layn laynez que ovo a tujno conprado. E fernand laynez de {7o} sant esteuan muy lozano. El aluor qria quebar Et avn el dia non era claro. Quando assomauan los çinco Reys moros por el llano. por la deffesa de sant esteuan a duero non son llegados. Ally aderezo Rodrigo sus gentes acaudellando bueluen la batalla llegar querran al quarto. Muchas gentes se perdi eron de moros & de xpianos Malos peccados y morieron qtro fijos de layn caluo Muchos buenos cauallos enderredor Rodrigo los ovo encontrados. desque vio el padre & los tios muertos. ovo la color mudado. quisieran arramar los xpistianos. Rodrigo ovo el escudo enbraçado por tornar los xristianos del padre non ovo cuydado. ¶ Ally fue mezclada la batalla Et el torneo abiuado Paradas fueron las azes Et el torneo mezclado. ¶ Ally llamo Rodrigo a santyago fijo del zebedeo. Non fue tan bueno de armas judas el macabeo. njn archil njcanor njn el rey tholomeo Cansados fueron de lidiar Et fartos de tornear ¶ Tres dias estido en pesso la fazienda de rrodrigo de biuar A pocas quelo non tomaron entrega armado estando esto le aconsejo por el buen Rey don fernando Quando los condes vendieron el reynado. la batalla vençio Rodrigo por ende sea dios loado Mato al rey garay moro de atiença. ¶ E al rey de ciguenza su hermano. Et mato al de gu adalajara. Et prisso al madriano Et al talauerano Et a otros moros afartos Ca muy bien le ayudo el rey moro burgos de ayllon loçano. Que era su vassallo. Et traxieron los dos Reys moros para el pueblo çamorano ¶ Tornosse Rodrigo para castilla tan sannudo & tan yrado toda la tierra tembraua conel castellano. fue destroyr a rre dezilla & quemar a bilforado Conbatieron A grannon.} E prisso al conde don garçi ferrnandez con su mano Por villa franca de montes doca le leuaua apressionado. E violo el conde don ximeno sanchez de burueua su hermano E quando lo vio rrodrigo luego le salio al alcançe Ençerrolo en .vij. barrios que es birujesca llamado En santa maria la antigua Se encerro el conde lozano Conbatiolo rrodrigo amjdos que non de grado. ovo de Ronper la yglesia Et entro enella priuado. sacolo por las baruas al conde De tras el altar con su mano E Dixol sal aca aleuo so & ve vender a xristianjs mo. & a moros Et matar atu sennor honrrado. Dos condes lieua pressos rrodrigo a carrio. fue llegado. ¶ Quando lo so pieron los condes de carrion & de castilla Todos se alegraron Et fezieron la jurar en las manos & omenaje le otorgar que a treynta dias contados fuessen antel rey don fernando Conlos pressos fue Rodrigo al pueblo çamorano. Et metiolos en pressyon conlos moros & caualgo priuado. ¶ Et sale a rreçebir alos camjnos al buen Rey don fernando Et encontrolo entre çamora & be navente do es moreruela po blado. desde ally fasta çamora fue gelo contando. ¶ El rey quando lo oyo enbio portodos sus Reynados. portogalesses Et galizianos leonesses Et asturianos. Et estremadura con castellanos. Et ally los mando el rey tan ayna judgar. los condes que tal cossa fazian que muerte merecian. ¶ Judgaron portogalesses abueltas con gallizianos dieron por juyzio que fuese despenados Iudgaron leonesses con asturianos dieron por juyzio que fuessen arrastrados Judgaron castellanos abuelta con estremadanes. Et dieron por juyzio que fuesse qmados. ffijos fueron del conde don pedro [tachado: mucho] del canpo mucho onrrado Quando sopieron que Rodrigo delos Reynos era echado Entraron a palençia por fuerça que pmero era condado. E a muy grand dessonrra echaron fuera al perlado. E fuesse querrellar al pueblo çamorano Senor mjenbre se te Canon te deue ser olujdado Conel rey vuestro padre oue a palençia franqueado ¶ Et dixo el rey muchas cossas que yo non puedo fazer mal peccado Dixo arnaldo el perlado yr qiero a Roma querellar lo Essas horas dixo el rey Como vieredes mas guissado Calos reynos tengo que se me alçaran & los fijos dalgo. Dyos traxiesse a Rodrigo Que sabria calonnar lo} Ca yo enla Romeria he abondo mal peccado enla vnjdat forçada fasta que yo pueda emendarlo En esta querella llego otro mandado Cartas del rey de françia & del emperador alemano Cartas del patarcha & del papa Romano Que diessen tributo espanna [tachado: espa] & françia desde aspa fasta en santiago. El Rey que en espanna visqujese Siempre se llamasse tributario Diese fuero & tributo cada anno Cinco son los Reynados de espanna. asy vinje afirmado que diessen quinze donçellas vir gines en cada anno. E fuessen fijas dalgo. & diez cauallos los meJores del reynado Et treynta marcos de plata que despensasen los fijos dalgo Et azores mudados. Et tres falcones los meJores delos reynados. ¶ Etste tributo que diesse cada anno en quanto fuessen biuos xianos ¶ Qndo esto oyo el buen Rey don fernando. batiendo va amas las palmas las azes quebrantando. peccador sin ventura aque tiempo so llegado. Quantos en espanna visquieron nunca se llamaron tributarios Amj veen me njno & sin sesso Et van me soberujando. Mas me valdria la muerte Que la vida que yo fago Agora enbiare por mjs va ssallos. que me semeJa guissado Et consejar me he conellos sy sere tributario. Ally embio por Rodrigo Et por todos los fijos dalgo Enbiara atreguar los condes que non temjessen de danno llego con ellos Rodrigo al pueblo çamorano. Et tomo los por las manos & leuolos antel Rey don ferr Senor perdona aquestos condes syn arte & sin engano. yo los perdono sin arte & sin engano por non te salir Rodrigo de mandado. Quelos çinco Reys despana quiero que anden por tu mano Ca françia & alemana fazen me tributario. Et el papa de Roma que debia vedar lo Vedes aqui su preujllegio con su sello colgado ¶ Estonçe dixo Rodrigo por ende sea dios loado Ca vos enbian pedir don vos deuedes otrgarlo Avn non vos enbia pedir tributo. Mas enbia vos dar algo. Mostrar vos he yo aqueste av ganarlo. ¶ Apellydat vuestros regnos. desde los puertos de aspa fasta en santiago Sobre lo suyo lo ayamos lo nuestro este quedado. Sy non llego fasta paris non deuia ser nado. Por esta rrazo dixieron el buen don ferrnando} par fue de emperador mado a castilla vieja. Et mando a leon Et mando alas esturias fasta en sant saluador Mando a galiçia onde los caualleros son. Mando a portogal essa trra jenzor. Et mando a cohinbra de moros. poblo a monte mayor poblo a sorya frontera de aragon E corrio a seujlla tres veçes en vna sazon. A dar gela ovieron moros que qsieron o que non Et gano a sant ysydro Et aduxolo a leon ovo a nauarra encomjenda Et vino le obedeçer El rey de aragon A pessar de françesses los puertos de aspa passo A pessar de Reys & de emperadores a pessar de Romanos dentro en paris entro Con gentes honrradas que de espanna saco El conde don ossoryo el amo quel crio Et el conde don martin gomez vn portogales de pro Et el conde don nuno nunz que a simancas mando y el conde don ordonno de capos el mejor Et el conde don fruela que a salas mando Et el conde don aluar rrodriguez que alas asturias mando Etste poblo a mondonnedo Et [blanco] de enquebrando y el conde don galin laynez el bueno de carrion y el conde don essar sennor de monçon y el conde don rrodrigo de cabra sennor E el conde don bellar escogiera el mejor. Et el conde don ximon sanches de burueua sennor Etl el conde don gaçia de cabra de todos el mejor Et el conde garçi fernandez el bueno crespo de grannon Almerique de nabona ql dizen don qron Con ellos va Rodrigo de todos el mejor los çinco Reys de espanna todos juntados son Passauan allede duero passauan allende arlanzon E [blanco] siete semanas por cuenta. estido el Rey don fernando atendiendo batalla en vna lid en canpo Apellydose françia con gentes enderredor. Apellydose lonbardia asy commo el agua corre Apellydose Pauja & otras gentes Apellydose alemana conel emperador. pulla & talabra. Et sezilla la mayor Et toda tierra de Roma con qntas gentes son Et armenja Et persia la mayor Et frandes & rrochella & toda tierra de vltmar Et el palazin de blaya Saboya la mayor Quales atauetradores del buen Rey don fernando El conde don firuela Et el conde don ximon sachez vieron venjr grandes poderes del conde saboyano con mjll & nueveçientos caualleros a cauallo venjeron se contra} el rey de castilla. llamando alas armas caualleros el buen Rey don fernando A Ruedano passemos ante que prendamos danno que atantos son françesses commo yeruas del canpo essas horas dixo el rrey don ferrnando Non es lo que yo demando grandes tiempos ha passado Que yo saly de mjs reynados Quantos della saque todos son despensados. al dia que yo cob diciaua ya se me va allegado de ver me en lid en campo. Con quien me llama tributario varones que me fizo rey Sennor de espanna. la mesura de vos otros fijos dalgo llamastes me sennor Et bessastes me la mano yo vn omne so sennero commo vno de vos otros. quanto es del mj cuerpo non puede mas que otro omne Mas do yo metier las manos por dios vos sacaldas. Que grand pression espera espanna mjentra el mundo fuere que vos non llame tributarios en njguna sazon. Ca vos orarian mal sieglo qntos por naçer son A njng destas querellas njg non le respondio El rey conla malenconja por el corazon queria quebrar Demando por Rodrigo el que naçio en biuar. Recudiole Rodrigo la mano le besso. que vos plaze sennor el buen Rey don fernando. Sy conde o Rico omne vos salio de mandado. Muerto o presso meter vos lo he en vuestra mano. Essas oras dixo el rey seyas bien aventurado Mas sey alferze de mj sena syemp telo avre en grado Et sy me dios tona a espanna syemp te fare algo Ally dixo Rodrigo Senor non me sya dado. do esta tanto omne Rico & tanto conde Et tanto poderosso fijo dealgo A quien pteneçe sena de sennor tan honrrado. Et yo so escudero & non cauallo armado. Mas besso vras manos Et pido vos vn don. Quelos pmos golpes. yo con mjs manos los tome Et abrir vos he los camjnos por do entredes vos. Essas horas dixo el Rey otorgo telo yo. Essas oras Rodrigo atan a priessa fue armado con trezientos caualleros quel bessauan la mano Cont el conde de saboya salyo. tan yrado Rodrigo nunca viera Sena nj pedon devissado. Ronpiendo va vn manto que era de sirgo la penna le tiro puado a priessa esto de punta ala meter la espada que traya al cuello tiro la tan puado. Quinze Ramos faze la sena vguença avia dela dar alos caualleros. Et bolujo los ojos en alto. vio estar vn su sobno fijo de su hermano Quel dizen po mudo} Ael fue llegado. ven aca mi sobrino fijo eres de mj hermano El que fizo mj hemano en vna labradora quando andaua cazando. varon toma esta sena faz lo q yo te mando. Dixo po bemudo. que me plaze de grado Conosco que so vro sobrino fijo de vro hermano Mas de que saliestes de espanna non vos ouo menbrado A cena nj a ayantar non me oviestes conbidado. de fanbre & de frio so muy coytado Non he por cobertura del cauallo por las crietas delos pies correme sangre clara. Ally dixo rr calla tydor puado todo omne de buen logar. que quiere sobir a buen estado. Conviene que delo suyo sea abidado que atienda mal. & bien sepa el mundo passar lo. Pero mudo tan a priessa fue armado Reçebio la sena. a Rodrigo besso la mano. Et dixo senor. afruenta de dios te fago. vey la sena sin engano que en tal logar vos la pondre antes del sol çerrado. Do nunca ent sena de moro nj de xpiano. Ally dixo Rodrigo esso es lo q yo te mando. Agora te conosco que eres fijo De mj hemano. Con trezientos cauallos yua la sena guardando violo el conde de saboya. en tanto fue espantado Et dixo alos cauallos. Caualgat muy puado Sabed me de aquel espanol sy viene dela tierra echado Si fuere conde o Rico omne venga me bessar la mano Sy fuere omne de buen logar tome mjo mayoradgo. Tan a priessa los latinos. A Rodrigo son llegados Et fizo se maraujllado quando gelo contaron. Tornat vos dixo latinos al conde mj mandado. Et dezilde que non so Rico njn poderoso fidalgo Mas so vn escudero non cauallero armado ffijo de vn mercadero. njeto de vn çibdadano mj padre moro en Rua Et siempre vendio su pano ffincaron me dos pieças el dia que fue finado. Et commo el vendio lo suyo vendere yo lo mjo de grado Ca quien gelo conpua. muchol costaua caro Pero dezjlde al conde que de mj cuepo atanto que de muerto o presso non me saldria dela mano El conde qndo esto oyo fue mucho sanudo Et yrado Espanol fide enemjga ya vos viene menazando todos los otros mueran. Aquel sea pressyonado E leuat melo a saboya muy las manos atadas colgar lo he delos cabellos del castillo puado. Mandare amjs Rapazes tan sin duelo. Que enel medio dia diga que es noche cerrada. Caudillan las azes Et lidian tan de grado Saboya llamo el conde. E castilla el castellano Veredes lidiar a profia Et tan firme se dar Atantos pendones obrados alçar & abaxar. Atantantas lanças qbradas por el pmero qbrar Atantos cauallos caer Et non se leuantar Atanto cauallo syn duenno por el campo andar. En medio dela mayor priessa Rodrigo fue entrar Encontrosse conel code Vn golpe le fue dar derribolole del cauallo non le qisso matar Presso sodes don conde el onrrado soboyano Desta guissa vende panno aqste çibdadano Assy los vendio mj padre fasta q fue finado Qujen gelos conpraua assy les costaua caro Essas dixo el conde messura espanol onrrado Que omne que asy lidia non deuja s villano O eres hermano o pmo del buen Rey don fernando Como dizen el tu nonbre Si a dios ayas pagado Ally dixo Rodrigo. non te sera negado. Rodrigo me llaman aqstos qntos aq tyo ffijo so de diego laynez Et njeto de layn caluo Essas oras dixo ay mesqino desaventurado. Cuyde que lidiaua con omne & lidie con vn peccado Que dentro poco ha que fueste nonbrado que non te atiende Rey moro njn xpiano enel campo Ca de muerto o de presso non te saldria de la mano Oy lo contar al rey de françia Et al papa de Roma Que nunca prendes omne nado Que nunca te prendiesse. Dame de que gujssa podria yo salir de tu pssyon que non fuesse dessonrrado Cassar te ya con vna mj fija que yo mas amo & non he otra fija Nyn otro fijo que herede el condado Ally dixo Rodrigo. pues enbia porella muy puado Sy yo della me pagare que cabe se fara el mercado. ya van por la ynfanta a poder de cauallo Traen la guarnjda en vna silla muy blanca. De oro el freno non mejor obrado vestida va la ynfanta De vn baldoque preçiado Cabellos por las espaldas commo de vn oro colado ojos prietos commo la mora El cuepo bien tajado. Non ha rrey nj emperador que della non fuese pagado Qndo la vio Rodrigo tomola por la mano Et dixo conde yt a buena ventura muy puado. Que non cassaria co ella. por quanto yo valgo Ca non me pteneçe fija de code njn de condado. El rey don fernando es por cassar ael mela qero dar Sy faga mayoralgo conde por quanto delos ojos vedes non vos coja mas enel canpo Dauala Rodrigo alos suyos lieuan la passo El acogiesse para el rey al galope del cauallo Dixo albricias Senor que vos trayo buen mandado en mjll & noueçientos cauallos fize muy gnd danno prisse al conde de saboya por la barba syn su grado Dyo me por sy su fija. Et yo para vos la qero Et besso las manos. Et vos que me fagades algo Essas oras dixo el rey Solo non sea penssado. Ca por conqryr reynos vine aca. ca non por fijas dalgo Ca nos la quesieramos en espa na fallaramos afartas Essas oras dixo Rodrigo Senor fazed lo puado enbarraganad. a françia Sy a dyos ayades pagado Suya sa la dessonrra yr los hemos denostando. Assy bolueremos con ellos la lid enel campo. Essas oras fue el Rey ledo & pagado. Et dixo Rodrigo. pues en mjll & noveçientos fezistes grand danno. Delos tuyos qntos te fincaron sy a dios ayas pagado. Ally dixo Rodrigo non vos sera negado. lleue trezientos caualleros Et traxe qrenta & quatro Quando esto oyo el rey tomo lo por la mano Al rreal de castellanos amos a dos entron El rey enbio a dos a dos los caualleros de mando fasta que aparto .dcccc. que a Rodrigo bessassen la mano Dixieron los .dcccc. pero dyos sea loado Con tan onrrado senor que nos bessemos la mano De Rodrigo que avia nonbre Ruy diaz le llamaron. Caualgan estos .dcccc. ala ynfanta tomaron Entre la tienda del buen Rey don fernando Con ella fue el rey muy leydo & pagado Ally dixo Rodrigo al buen Rey don fernando Caualgue vuestros reynos Et non sean en tardar lo yo yre enla delantera con estos .dcccc. q yo tyo Senor lleguemos a paris q asy lo avre otorgado Ca ay es el Rey de françia Et el emperador alemano y es el patriarcha. Et el papa Romano. q nos estan esperando a qles diessemos el tbuto Et nos qremos gelo dar puado. que fasta que me vea conellos non serya folgado Entran enlas armas. Comjençan de caualgar la delantera lieua rrodrigo de biuar Caualgan enla mannana al aluora El buen Rey don fernando los poderes juntaua ya eran fuera de paris assentados en tantas tiedas en tantos Ricos estrados Ally llego Rodrigo co .ccc. caualleros Ally se Reptan françesses abueltas con alemanes Rietanse los françesses con tantos delos Romanos Ally fablo el conde de saboya muy grandes bozes dando Quedo dixo los Reynos non vos vades coytando aquel espanol q ally vedes es diablo en todo el diablo lle dio tantos poderes que assy viene aconpanado Con mjll q trae mal me ha desbaratado. [tachado: e] Etn mjll & noveçientos fizo me grand danno prisso me por la barba amjdos & non de grado Alla me tiene vna fija donde soy muy cuytado Ally finca la tienda de rruy diaz el castellano Enel tendal don rruy diaz caualga a pessa enl su cauallo baujeca. el escudo ante pechos el pendon enla mano. Oyt dixo los noueçientos veredes lo q fago. Sy non diesse conla mano enlas puetas de paris non serya folgado. sy podiesse mezclar batalla. el torneo parado Que cras qndo el llegasse que nos fallase lidiando Ally movio Ruy diaz entre las tiendas delos fraçesses Expoloneo el cauallo & ferya los pies enla tierra yua teblado Enlas puetas de paris fue ferir conla mano. A pessar de fraçesses fue passar commo de cabo Parosse antel papa muy quedo estido. Que es esso françesses & papa Romano Syemp oy dezir q doze pars avia en françia lidiadores llamad los sy qsieren lidiar Comjgo caualguen muy puado ffablo el rrey de françia non es guissado Non ay delos doçe pares que lidiasse sy non conel rrey don frr Apartat desque venjere el rrey de espanna don fernado Et [tachado: &] lidiare conel de grado Ally dixo Ruy diaz el buen castellano Rey vos & los doze pares de mj seres buscado. ya se va rruy diaz alos sus vassallos dan çeuada de dia los sus vassallos son armados todos la tierra fasta el sol rraya assomaron los poderes del buen Rey don fernando. A Reçebir los sale Ruy diaz Et tomo al rrey por la mano Adelante dixo sennor el buen rrey don fernando. El mas honrrado sennor que en espanna fue nado ya qrrian auer en graçia los que vos llama tributario Agora sanare del dolor que andaua coytado Tan seguro andat por aqui commo sy oviesedes entdo yo lidiare con estos estad quedado Ally dixo el rey Ruy diaz el castellano. Como tu ordenares mjs reyno en tanto se folgado. Ally finco Ruy diaz la tienda del buen Rey don fernando Conlas suyas cuerdas mezcladas aderredor delos castellanos abuelta con estremadanos la costanera aragonesses navarro Con leonesses con asturyanos por mantener la çaga portoga lesses con galizianos Qndo esto vio el papa rromano Dixo oyt me Rey de françia el emperador[tachado: s] alemano Semeja que el rey de espanna es aquj llegado. Non viene con mengua de corazo mas commo Rey esforçado Agora podredes aver derecho sy podieremos tomarlo Qnto ave saco de espanna todo lo ha despenssado Agora ganare del tregua por qt anos es chico el plazo despues darle hemos guerra Et toma le hemos el reynado dixieron los rreys Senor enbiat por el puado. A priessa enbia por el rrey el papa Romano Qndo esto oyo el rrey don ferr Armose el Et los fijos dalgo en senos cauallos caualgan Etntre el rey Et el castellano Amos lanças enlas manos Mano por mano fablando. aconsejandole Ruy diaz a gujssa de buen fidalgo Senor en aqsta fabla sed uos bien acordado ellos fablan muy maso Et vos fablat muy brauo Ellos son muy leydos Et andar vos han enganado Senor pedildes batalla para cras enel aluor qbrado El papa qndo lo vio venjr en ante fue acordado oyt me dixo el bue emperador alemano. Aqueste rey de espanna semejame mucho onrrado Ponet ay vna silla a par de vos & cobrilda con este pano Quando vieredes q descaualga leuantad vos muy puado Et prendet lo por las manos Et cabe de vos possaldo Que sea en par de vos que me semeja guissado. Ally se erzia los poderes de Roma al bue rrey don fernando Non sabia qual era el rey nj ql era el castellano Sy non qndo descaualgo el rrey al papa besso la mano. Et leuantosse el emperador Et Reçebio los muy de bue grado Et toman se por las manos al estrado van possar Alos pies del rey se va possar rruy diaz el castellano Ally fablo el papa comenzo a preguntarlo Digas me Ruy diaz de espanna Sy a dyos ayas pagado Sy qieres s emperador de espa na. dar te he la corona de gdo} Ally fablo Ruy diaz ante que el rey don fernado Deuos dios malas gçias ay papa Romano Que por lo por gana venjmo que non por lo ganado Ca los çinco Reynos de espanna Syn vos lo bessan la mano viene por conqrir el emperyo de alemanja que de derecho ha de heredar lo Assentosse enla silla. por ende sea dios loado Vere q le dan avantaja dela ql sa ossado. Conde alemano quel de la corona Et el blago. En tanto se leuanto el bue Rey don fernando. A treguas venjmos Que non por fazer danno vos adelinat mj senor Ruy diaz el castellano Estonçe rruy diaz A pessa se fue leuatado Oyt me dixo Rey de françia E enperador alemano Oyt me patriarcha & pp roma. Enbiastes me pedir tbutario Traer vos lo ha el buen Rey do fernando. Cras vos entregara en buena lid enel campo. los macos quel pedistes. Vos Rey de françia de mj sedes buscado Vere sy vos acorrera los doçe pares. o algun françes loçano Emplaçados fincan para otro dia enel campo. aleg se va el bue Rey don ferr. Ala su tienda lieua a Ruy diaz que non qiere dexarlo. Ally dixo el rey a Ruy diaz ffijo eres de diego laynez Et njeto de layn caluo Cabdiella bien los Reynos desque cantare el gallo Essas oras dixo Ruy diaz que me plaze de grado Cabdillare las azes ante del aluor qbrado Como esten las azes paradas. en ante del sol rrayado. A priessa dan çeuada Et piensan de caualgar las azes son acabdilladas quando el aluor qiere qbrar Mandaua Ruy diaz alos castellanos al buen rey don fernando guardar Va Ruy diaz conlos .dcccc]. la delantera fue tomar Armadas son las azes Et el pregon apregonado lla vna & las dos ala tçera llegando. la ynfanta de saboya fija del conde saboyano yazia de parto enla tienda del buen Rey don fernando Ally pario vn fijo varon El papa fue tomarlo Ante que el Rey lo sopiesse fue el ynfante xpistiano Padrino fue el rey de françia Et el enperador alemano. padrino fue vn patarcha Et vn cardenal onrrado Enlas manos del papa el ynfante fue xpiano Ally llego el buen rey don fenado Qndo lo vio el papa passo el ynfante a vn estrado. Començo de predicar Muy grandes bozes dando Cata diz rey de espanna como eres bien aventado Con tan grand onrra. Dios que fijo te ha dado Miraglo fue de xps El sennor apoderado Que non qsso que se pdiesse xpistia njsmo. desde Roma fasta stiago Por amor deste ynfante que dios te ovo dado. Da nos tregua sy quiera por vn anno Ally dixo Ruy diaz sol non sea pensado Saluo sy es entrega Enpero mas qremos aplazalo Et tal plazo nos dedes que podamos entregarlo O morra este emperador ol daremos Reynado apartado Dixo el rey don fernando do uos quatro annos de plazo Dixo el rey de françia Et el emperador alemano por amor deste ynfante que es nuestro afijado. Otros quatro anos vos pedimos de plazo Dixo el rey don fernando Sea vos otorgado. E por amor del patarcha do vos otros. quatro annos E por amor del cardenal.

Mocedades de Rodrigo. Edición digital