Mocedades de Rodrigo. Edición digital

dro de arlança. ¶ E este nuno rasura. ovo vn fijo quel dixieron gonçalo nunnez. ¶ Et porq era malo & traujesso. qissolo el padre matar. & fuesse pa el rrey moro guiben. Senor de madrid ¶ E fallo alla a dona aldara sanchez. fija del rey don sancho Ramjrez de navarra. q andaua mala mugier conlos moros. ¶ E pediola por mugier que aca non gela darien. ¶ E casso con ella & traxola a castilla. ¶ E fizo enella tres fijos. & los mayores non valiero nada. ¶ Et el menor fue el conde frrnad gonçalez. q mantouo a grand castilla muy grant tiempo. ¶ Et ovo de aver contienda conel Rey don sancho ordonez de nauarra. ¶ Et este Rey don sancho ordonez fizo vistas conl conde ferrnand gonçalez en vn lugar q diçen vanarez. ¶ E yendo el conde seguro prissol el Rey en engano. Et lleuolo presso a tudela de nava rra. ¶ Et yaziendo el conde presso sacolo dona costança hermana del Rey don sancho ordonez. ¶ Et yaziendo el con de enlos fierros. tomo lo la Jnfanta asus cuestas. Et dio con el en vn monte. ¶ Et encoron a vn açipreste de ay de tudela de navarra. ¶ Et dixo q si la infanta nonle fiziesse amor de su cuerpo quelos descobrerya. ¶ Et la ynfanta fue abraçar lo. Et tenjendole la Jnfanta abraçado. llego el conde con sus fierros. Et matolo conel su cochillo mjsmo del açipste. ¶