|
|
Veriedes aduzir tanto cauallo corredor
Tanta gruessa mula tanto palafre de sazon
Tanta buena espada contoda guarnizon
Recibiolo myo çid como apçiaron enla cort
Sobre los dozientos marcos q tenie el Rey alfonsso
Pagaro los yfantes al q en buen ora nasco
En pstan les delo ageno q no les cumple lo suyo
Mal escapan iogados sabed desta Razo
Estas apçiaduras myo çid psas las ha
Sos omes las tienen & dellas penssarea
Mas qando esto ouo acabado penssaron luego dal
Merçed ay Rey senor por amor de caridad
La Rencura mayor non seme puede olbidar
Oyd me toda la cort & peseuos de myo mal
Delos yfantes de carrion qm desondraro tan mal
Amenos de Riebtos no los puedo dexar
Dezid q uos mereçi yfantes en juego o en vero
O en alguna Razo aqi lo meiorare a juuizoyo dela cort
A qm descubriestes las telas del coraço
Ala salida de valençia mis fijas vos di yo
Con muy grand ondra & averes a nombre
Qando las non qriedes ya canes taydores
Por q las sacauades de valençia sus honores
A q las firiestes a çinchas & a espolones
Solas las dexastes enel Robredo de corpes
Alas bestias fieras & alas aues del mont
Por qanto les fiziestes menos valedes vos
|
