|
|
Assis yran vengando de don eluira & dona sol
Aso sobrino por nonbrel lamo
Tendio el braço la espada tizon le dio
Prendet la sobrino ca meiora en senor
A martin antolinez el burgales de pro
Tendio el braço el espada coladal dio
Martin antolinez myo vassalo de pro
Prended a colada ganela de bue senor
Del conde de Remont verengel de barçilona la mayor
Por esso uos la do q la bien curiedes uos
Se q si uos acaeçiere co ella ganaredes grad pz & grad valor
Besole la mano el espada tomo & Reçibio
Luego se leuanto myo çid el campeador
Grado al criador & auos Rey senor
Hya pagado so de mis espadas de colada & de tizon
Otra Rencura he de yfantes de carrion
Qando sacaron de valençia mis fijas amas ados
En oro & en plata tres mill marcos de plata les dio
Hyo faziendo esto ellos acabaro lo so
Denme mis aueres qando myos yernos non son
Aqi veriedes qxar se yfantes de carrion
Dejze el conde don Remod dezid de ssi o de no
Essora Responden yfantes de carrion
Por essol diemos sus espadas alçid campeador
Q al no nos demandasse q aqi finco la boz
Si ploguiere al Rey assi dezimos nos Dixo el Rey
Alo q demanda el çid ql Recudades vos
|
