|
|
Atorgan los alcaldes tod esto es Razon
Dixo el conde don garçia aesto nos fablemos
Essora salien aparte yffantes de carrion
Con todos sus parientes & el vando q y son
Apiessa lo yuan trayendo & acuerdan la Razon
Avn grand amor nos faze el çid campeador
Qando desondra desus fijas no nos demanda oy
Bien nos abendremos con el Rey don alfonsso
Demos le sus espadas qando assi finca la boz
E qando las touiere partir sea la cort
Hya mas non aura derecho de nos el çid canpeador
Con aqsta fabla tornaron ala cort
Merçed ya Rey don alfonsso sodes nro senor
Nolo podemos negar ca dos espadas nos dio
Qando las demanda & dellas ha sabor
Dar gelas qremos dellant estando uos
Sacaro las espadas colada & tizon
Pusieron las en mano del Rey so senor
Saca las espadas & Relumbrã toda la cort
Las maçanas & los arriazes todos doro son
Marauillan se dellas todos los omes buenos dela cort
Reçibio las espadas las manos le beso
Tornos al escano don se leuanto
En las manos las tiene & amas las cato
Nos le pueden camear ca el çid bien las connosçe
Alegros le todel cuerpo sonrrisos de coraçon
Alçaua la mano ala barba se tomo
Par aqsta barba q nadi non messo
|
