|
|
E vio venir adiego & a fernando
Amos son fijos del conde don goçalo
Alegros myo çid fermoso sonrrisando
Venides myos yernos myos fijos sodes amos
Seq de lidiar bie sodes pagados
Acarrion de uos yran buenos mandados
Como al Rey bucar avemos arrancado
Como yo fio por dios & en todos los sos scos
Desta arracada nos yremos pagados
Mynaya albarfanez essora es legado
El escudo tae al cuello & todo espado
Delos colpes delas lanças non auie Recabdo
Aqlos q gelos dieran no gelo auien logrado
Por el cobdo ayuso la sangre destellando
De .ixx. arriba ha moros matado
De todas partes sos vassalos van legando
Gradio adios & al padre q esta en alto
Ea uos çid q en bue ora fuestes nado
Matastes abucar & arrancamos el canpo
Todos estos bienes deuos son & de uros vassallos
Euros yernos aqi son en sayados
Fartos de lidiar con moros enel campo
Dixo myo çid yo desto so pagado
Qando agora son buenos adelant seran pçiados
Por bien lo dixo el çid mas ellos lo touiero amal
|
