|
|
Vos agora legastes & nos vinjemos anoch
Myo huesped seredes çid campeador
E cras feremos lo q plogiere auos
Beso le la mano myo cid lo otorgo
Essora setle omillan los yffantes de carrion
Omillamos nos çid en buen ora nasqiestes uos
En qanto podemos andamos en uro pro
Respuso mio çid assi lo mande el ciador
Myo çid Ruy diaz q en ora buena nasco
En aql dia del Rey so huesped fue
Non se puede fartar del tantol qrie de coraçon
Catandol sedie la barba q tan aynal creçiera
Marauillã se de myo çid qantos q y son
Es dia es passado & entrada es la noch
Otro dia manana claro salie el sol
El campeador alos sos lo mando
Q adobassen cozina pora qantos q yson
De tal guisa los paga myo çid el campeador
Todos era alegres & acuerdan en vna Razon
Passado auie .iij. anos no comiera meior
Al otro dia manana assi como salio el sol
El obpo don ihonimo la missa canto
Al salir de la missa todos iuntados son
Non lo tardo el Rey la Razon conpeço
Oyd me las escuellas cuendes & yfançones
|
