|
|
E todos los otros q y son
Aluar saluadorez & galind garciaz el de aragon
A aqstos dos mando el campeador q curien a valençia
Dalma & de coraçon & todos los q en poder dessos fossen
Las puertas del alcaçar q non se abriessen de dia ni de noch
Dentro es su mug & sus fijas amas ados
En q tiene su alma & su coraçon
E otras duenas q las siruen a su sabor
Recabdado ha como tan buen varon
Q del alcaçar vna salir non puede
Fata qs torne el q en bue ora nasco
Salien de valençia aguijan & espolonauan
Tantos cauallos en diestro gruessos & corredores
Myo çid selos ganara q non gelos diera en don
Hyas va pora las vistas q co el Rey paro
De vn dia es legado antes el Rey don alfonsso
Qando vieron q vinie enl buen campeador
Reçebir lo salen con ta grand onor
Don lo ouo a oio el q en buen ora nasco
Atodos los sos estar los mando
Si non a estos cauallos q qrie de coraço
Con vnos .xv. a trras firio
Como lo comidia el q en buen ora naçio
Los ynoios & las manos en trra los finco
Las yerbas del campo a dientes las tomo
|
