|
|
El va en medio elos çiento aderredor
Qando lo vieron entrar al q en buen ora naçio
Leuantos en pie el bue Rey don alfonsso
E el conde don anrrich & el conde don Remont
E desi adelant sabet todos los otros
Agrant ondra lo Reçiben al q en bue ora naçio
Nos qiso leuantar el crespo de granon
Nin todos los del bando de yfantes de carrio
El Rey dixo al çid venjd aca ser campeador
En aqste escano qmdiestes uos endon
Mager q algunos pesa meior sodes q nos
Essora dixo muchas merçedes el q valençia gano
Sed en uro escano como Rey e senor
Aca posare con todos aqstos mios
Lo q dixo el çid al Rey plogo de coraçon
En vn escano tornino essora myo çid poso
Los çiento ql aguardan posan aderredor
Catando estan a myo çid qantos ha en la cort
Ala barba q auie luenga & psa conel cordon
En sos aguisamientos bien semeia varo
Nol pueden catar de verguença yfantes de carrion
Essora se leuo en pie el buen Rey don alfonsso
Oyd mesnadas siuos vala el ciador
Hyo de q fu Rey non fiz mas de dos cortes
La vna fue en burgos & la ota en carrio
Esta tçera a tolledo la vin fer oy
Por el amor de myo çid el q en bue ora naçio
q Reçiba derecho de
|
