|
|
El Rey don alfonsso a tolledo es entrado
Myo çid Ruy diaz en san seruan posado
Mando fazer candelas & poner enel altar
Sabor a de velar enessa santidad
Al ciador Rogando & fablando en poridad
En tre minaya & los buenos q y ha
Acordados fueron qando vino la man
Matines & pima dixieron fazal alba
Suelta fue la missa antes q saliesse el sol
E ssu ofrenda han fecha muy buena & coplida
Vos mynaya albarfanez el myo braço meior
Vos yredes comigo & el obpo don ihonimo
E po vermuez & aqste muno gustioz
E mr antolinez el burgales de pro
E albar albarez & albar saluadorez
E martin munoz q en buen punto naçio
E myo sobrino felez munoz
Comigo yra mal anda q es bie sabidor
E galind garçiez el bueno daragon
Con estos cunplansse çiento delos buenos q y son
Velmezes vestidos por sufrir las guarnizones
De suso las lorigas ta blancas como el sol
Sobre las lorigas arminos & peliçones
E q non parescan las armas bie psos los cordones
Solos mantos las espadas dulçes & taiadores
Da qsta guisa qiero yr ala cort
|
