|
|
Sonando vã sus nueuas todas atodas partes
Mas le vienen a myo çid sabet q nos le van
Metiola en plazo siles viniesse huuyar
Nueue meses complidos sabet sobrella iaze
Qando vino el dezeno ouieron gela adar
Grandes son los gozos q van por es logar
Qando myo çid gano a valençia & entro enla çibdad
Los q fueron de pie cauallos se fazen
El oro & la plata qien vos lo podrie contar
Todos eran Ricos qantos q alli ha
Myo çid don Rodrigo la qinta mando tomar
Enel auer monedado xxx. mill marcos le caen
Elos otros aueres qien los podrie contar
Alegre era el campeador con todos los q ha
Qando su sena cabdal sedie en somo del alcaçar
Ya folgaua myo çid co todas sus conpanas
Aql Rey de Seuilla el mandado legaua
Q psa es valençia q no gela enparan
Vino los ver co .xxx. mill de armas
Aps dela verta ouieron la batalla
Arrancolos myo çid el dela luega barba
Fata dentro en xatiua duro el arrancada
Enel passar de xucar y veriedes barata
Moros en aruenço amidos beuer agua
Aql Rey de marruecos co tres colpes escapa
Tornado es myo çid con toda esta ganançia
Buena fue la de valençia qando ganaro la casa
|
