|
|
Miedo an en valençia q non saben qse far
Sonando van sus nueuas alent parte del mar
Alegre era el çid & todas sus companas
Q dios le aiudara & fiziera esta arrancada
Daua sus corredores & fazien las tras nochadas
Legan a guiera & legan axatiua
Avn mas ayusso a deyna la casa
Cabo del mar tierra de moros firme la qbrata
Ganaron pena cadiella las exidas & las entradas
Qando el çid campeador ouo pena cadiella
Males pesa en xatiua & dentro en guiera
Non es co Recabdo el dolor de valençia
En tierra de moros pndiendo & ganando
E durmiendo los dias & las noches tranochado
En ganar aqlas villas myo çid duro .iij. anos
Alos de valençia escarmentados los han
Non osan fueras exir ni con el se aiuntar
Taiauanles las huertas & fazia les grad mal
E cada vno destos anos myo çid les tolio el pa
Mal se aqxan los de valençia q no sabet qs far
De ninguna part q sea no les vinie pan
Nin da cosseio padre a fijo ni fijo a padre
Nin amigo a amigo nos pueden con solar
Mala cueta es senores aver migua de pan
Fijos & mugieres ver lo murir de fanbre
|
