|
|
Bien los ferredes q dubda no y a aura
yo con los çiento entrare del otra part
Como fio por dios el campo nro sera
Como gelo a dicho al campeador mucho plaze
Manana era & pienssan se de armar
Qis cada vno dellos bie sabe lo q ha de far
Con los aluores myo çid ferir los va
Enel nombre del criador & del apostol sci yague
Ferid los cauallos damor & de grado & de grand voluntad
Ca yo so Ruydiaz myo çid el de biuar
Tanta cuerda de tienda y veriedes qbrar
Arancar se las estacas & a costar se atodas partes los tedales
Los Moros son muchos ya qieren Reconbrar
Del otra part entroles albarfanez
Mager les pesa ouiero se adar & a arancar
Grand es el gozo q va por es logar
Dos Reyes de moros mataron en es alcãz
Fata valençia duro el segudar
Grandes son las ganançias q mio çid fechas ha
Prisieron çebola & qanto q es y adelant
De pies de cauallo los qs pudiero escapar
Robaua el campo epiessanse de tornar
Entranuan a muruiedro co estas ganançias q taen grades
Las nueuas de myo çid sabet sonando van
|
