Mocedades de Rodrigo. Edición digital

This is where the footnotes go.

Opciones de visualización

Texto: Transcripción Forma expandida Forma normalizada - Mostrar: Colores Formato <lb> Líneas Versos Escriba Escriba 2 Escriba 3 Imágenes - Etiquetas: Etiqueta POS Lema

Javascript seems to be turned off, or there was a communication error. Turn on Javascript for more display options.

yrado contrala corte et do. esta el buen Rey don fernando. ¶ Todos dizen ael que el que mato. al conde lozano. ¶ Quando Rodrigo bolujo los oJos todos yvan derramando. ¶ Avien muy grant pauor. del & muy grande espanto. ¶ Allego don diego laynez. al rey bessar le la mano. ¶ Quando esto vio Rodrigo. non le quisso bessar la mano. Rodrigo finco los ynoJos. por le bessar la mano. ¶ El espada traya luenga. el Rey fue mal espantado. A grandes bozes dixo. Tirat me alla esse peccado. Dixo estonçe don Rodrigo querria mas vn clauo Que vos seades mj sennor. njn yo vuestro vassallo. ¶ Por que uos la besso mj padre Soy yo mal amanzellado. ¶ Essas oras dixo el rey al. conde don ossorio su amo. Dad me vos aca essa donçella. despossaremos este lozano. ¶ Avn non lo creyo don diego. tanto estatua espantado. Salio la donçella. Et trae la el conde por la mano. ¶ Ella tendio los ojos. Et a Rodrigo comenzo de catarlo. ¶ Dixo sennor muchas merçedes. Ca este es el conde que yo demando. ¶ Ally despossauan a donna xi mena gomez con rrodrigo el castellano. ¶ Rodrigo respondio muy sannudo. contra el Rey castellano. Sennor vos me despossastes. mas a mj pessar que de grado. ¶ Mas prometolo a xpistus. que vos non besse la mano. Nyn me vea con ella. en yermo njn en poblado. ¶ ffasta que venza çinco lides. en buena lid en canpo. ¶ Quando esto oyo el Rey. fizo se maravillado. dixo. ¶ Non es este omne. mas figura ha de peccado. ¶ Dixo el conde don ossorio. mostrar vos lo he priuado. ¶ Quando los moros corrieren. a castilla non le acorra omne nado. ¶ veremos silo dize de veras. o silo dize baffando. ¶ Alli espedieron padre & fijo. Al camjno fueron entrados. ¶ ffuesse para biuar a sant pedro. de cardenna por morar y el verano. ¶ Corryo el moro a burgos. de ayllon muy lozano. ¶ Et el arrayaz bulcor. de sepulueda muy honrrado. ¶ E su hermano tosios el arrayaz. de olmedo muy Rico. & mucho abondado. ¶ Entre todos eran .v. mjll moros. a cauallo. ¶ Et fueron correr a castilla. Et llegaron a bilforado. ¶ Et quemaron a Redezilla. Et a grannon de cabo a cabo. ¶ A Rodrigo llego el apellido. quando en siesta estatua adormjdo. ¶ Deffendio que njnguno non desperta sse asu padre sol non fuesse vssado. ¶ Meten se alas armas & ca valgan muy priuado.