Mocedades de Rodrigo. Edición digital

This is where the footnotes go.

Opciones de visualización

Texto: Transcripción Forma expandida Forma normalizada - Mostrar: Colores Formato <lb> Líneas Versos Escriba Escriba 2 Escriba 3 Imágenes - Etiquetas: Etiqueta POS Lema

Javascript seems to be turned off, or there was a communication error. Turn on Javascript for more display options.

Mano por mano fablando. aconsejandole Ruy diaz a gujssa de buen fidalgo Sennor en aquesta fabla sed uos bien acordado ellos fablan muy manso Et vos fablat muy brauo Ellos son muy leydos Et andar vos han enganando Sennor pedildes batalla para cras enel aluor quebrando El papa quando lo vio venjr en ante fue acordado oyt me dixo el buen emperador alemano. Aqueste rey de espanna semejame mucho onrrado Ponet ay vna silla a par de vos & cobrilda con este panno Quando vieredes que descaualga leuantad vos muy priuado Et prendet lo por las manos Et cabe de vos possaldo Que sea en par de vos que me semeja guissado. Ally se erzian los poderes de Roma al buen rrey don fernando Non sabia qual era el rey njn qual era el castellano Sy non quando descaualgo el rrey al papa besso la mano. Et leuantosse el emperador Et Reçebio los muy de buen grado Et toman se por las manos al estrado van possar Alos pies del rey se va possar rruy diaz el castellano Ally fablo el papa comenzo a preguntarlo Digas me Ruy diaz de espanna Sy a dyos ayas pagado Sy quieres ser emperador de espa nna. dar te he la corona de grado} Ally fablo Ruy diaz ante que el rey don fernando Deuos dios malas graçias ay papa Romano Que por lo por ganar venjmos que non por lo ganado Ca los çinco Reynos de espanna Syn vos lo bessan la mano viene por conquerir el emperyo de alemanja que de derecho ha de heredar lo Assentosse enla silla. por ende sea dios loado Vere que le dan avantaja dela qual sera ossado. Conde alemano quel de la corona Et el blago. En tanto se leuanto el buen Rey don fernando. A treguas venjmos Que non por fazer danno vos adelinnat mj sennor Ruy diaz el castellano Estonçe rruy diaz A priessa se fue leuantado Oyt me dixo Rey de françia E enperador alemano Oyt me patriarcha & papa romano. Enbiastes me pedir tributario Traer vos lo ha el buen Rey don fernando. Cras vos entregara en buena lid enel campo. los marcos quel pedistes. Vos Rey de françia de mj seredes buscado Vere sy vos acorreran los doçe pares. o algun françes loçano Emplaçados fincan para otro dia enel campo. alegre se va el buen Rey don ferrnando. Ala su tienda lieua a Ruy diaz que non quiere dexarlo.