mocedades
Mocedades de Rodrigo. Edición digital
Opciones de visualización
Texto: - Mostrar: - Etiquetas:
Javascript seems to be turned off, or there was a communication error. Turn on Javascript for more display options.
conde que gelo pagasse a dia de plazo.
¶ largos plazos passaron que
non fue el conde pagado.
¶ Nyn quirie yr alas cortes
a menos de entregar lo.
¶ Con fijos & con fijos & con
mugieres castellannos van alas
cortes de leon.
¶ E conde ferrnan gonzalez.
dixo al rrey atanto.
Rey non verne a vuestras cortes.
a menos [tachado: amenos] de ser pagado.
del auer que me deuedes.
de mj azor & de mj cauallo.
¶ Quando contaron el auer
el Rey non podia pagar lo.
Tanto creçio el gallaryn
quelo non pagaria el regnado
¶ Venjeron abenençia el rrey
& el conde lozano.
¶ Que quitasse a castilla. el
conde fue mucho pagado.
¶ plogol al conde quando
oyo este mandado
¶ Assy saco a castilla
el buen conde don ferrnando.
¶ Aujendo guerra con moros &
con xristianos a toda parte de todo
su condado.
¶ Avia el conde vn fijo que
garçi ferrnandez fue llamado.
¶ Sy el padre fue buen guerrero
el fijo fue atamanno.
¶ Con fija de almereque de narbona
el conde garçi ferrnandez fue cassado.
¶ Con ella. Et fizo vn fijo.
que dixieron el conde don sancho
¶ Quando alos .vij annos los
Jnfantes de salas mataron.
¶ Morio el conde garci ferrnandez
cortes. infançon castellano.
¶ El buen conde don sancho.
& dexoles buenos preujllejos.
¶ Et buenos fueros con su mano.
Et fue rreçebir fija del rrey de leon.
nuera del conde don suero de casso.
¶ Et enella fizo vn fijo quel.
dixieron por nonbre sancho.
¶ Atanto salio de cazador
quel monte quel non cogia el poblado.
¶ Pussol por nonbre el padre
sancho avorta. por amor de destroyr
¶ Desque vio el padre que era
de edat a burgos fue llegado.
alos treynta dias conplidos.
ayuntan se y los castellano.
¶ desque los vio el conde en
pie fue leuantado.
¶ Oyt me castellanos a buen
tiempo so llegado.
¶ Por vos fazer mas merçed
que nunca vos fizo omne nado.
¶ El conde ferrnand gonçalez mj avuelo.
Saco vos de tributario.
¶ El conde garçi ferrnandez mj padre.
E yo diuos fueros & preujllejos
confirmados con mj mano.
¶ de condado que es castilla.
fago vos la rreynado.
¶ ffagamos mjo fijo sancho
avarca rrey si vedes que es guissado.
¶ Nieto es del Rey de leon.
non ha quel diga ome nado.
¶ Que non sea rrey de castilla
njnguno non sera ossado.
¶ synon aquel quien lo dixiesse.
bien sabria vedar lo.
¶ Mucho plogo a castellanos
quando oyeron este mandado.
¶ A sancho avarca bessan las ma
nos. Et rreal rreal llamando.
Leyenda: | Expansión • Tachado• Ilegible• Editor |
Descargar XML • Descargar texto
• Wordcloud • Facsimile view • Manuscript line view • Pageflow view