Mocedades de Rodrigo. Edición digital

This is where the footnotes go.

Opciones de visualización

Texto: Transcripción Forma expandida Forma normalizada - Mostrar: Colores Formato <lb> Líneas Versos Escriba Escriba 2 Escriba 3 Imágenes - Etiquetas: Etiqueta POS Lema

Javascript seems to be turned off, or there was a communication error. Turn on Javascript for more display options.

E Remaneçio la tierra sin sennor. quando moryo el rrey pelayo ¶ Este rrey pelayo avia vna fija de ganancia. ¶ E fue cassada conel conde don suero de casso. ¶ Et fizo en ella el conde don suero vn fijo que dixieron don alfonso. ¶ ¶ E a este don alfon fizieron rrey de leon. ¶ E los castellanos bevian en premja. ¶ E avian guerra con nauarra ¶ & con aragon. ¶ E con los moros de sant esteuan de gormaz. & de leon & de sepulveda. ¶ E era olmedo de moros & dende adelante la tierra frontera que avia castilla. bilforado. & grannon. ¶ Et dela otra parte era nauarra frontera de leon. & de carrion & de saldanna. ¶ Et por que los castellanos yvan a cortes al rrey de de leon con fijas & mugieres por esta razon fizieron en castilla dos alcaldes. ¶ E quando fuesse el vno. ala corte. quel otro manparasse la tierra. ¶ Quales fueron estos alcaldes. ¶ El vno fue nunno Rassura. ¶ E el otro layn caluo. Et porque dixieron nunno rrassura este nonbre. por que cogio de castilla sennas e mjnas de pan. ¶ E fizo voto a santiago queles ayudasse contra los moros. ¶ E el conde fue aqueste nunno Rassura. de sant pedro de arlança. ¶ E este nunno rasura. ovo vn fijo quel dixieron gonçalo nunnez. ¶ Et porque era malo & traujesso. quissolo el padre matar. & fuesse para el rrey moro guiben. Sennor de madrid ¶ E fallo alla a donna aldara sanchez. fija del rey don sancho Ramjrez de navarra. que andaua mala mugier conlos moros. ¶ E pediola por mugier que aca non gela darien. ¶ E casso con ella & traxola a castilla. ¶ E fizo enella tres fijos. & los mayores non valieron nada. ¶ Et el menor fue el conde ferrnad gonçalez. que mantouo a grand castilla muy grant tiempo. ¶ Et ovo de aver contienda conel Rey don sancho ordonnez de nauarra. ¶ Et este Rey don sancho ordonnez fizo vistas conel conde ferrnand gonçalez en vn lugar que diçen vannarez. ¶ E yendo el conde seguro prissol el Rey en enganno. Et lleuolo presso a tudela de nava rra. ¶ Et yaziendo el conde presso sacolo donna costança hermana del Rey don sancho ordonnez. ¶ Et yaziendo el con de enlos fierros. tomo lo la Jnfanta asus cuestas. Et dio con el en vn monte. ¶ Et encontraron a vn açipreste de ay de tudela de navarra. ¶ Et dixo que si la infanta nonle fiziesse amor de su cuerpo quelos descobrerya. ¶ Et la ynfanta fue abraçar lo. Et tenjendole la Jnfanta abraçado. llego el conde con sus fierros. Et matolo conel su cochillo mjsmo del açipreste. ¶